Giorgio Armani
Giorgio Armani – kişi, qadın geyimləri, ayaqqabı,
aksessuarlar, saatlar, kosmetika, interyer əşyaları və zərgərlik məmulatları
istehsal edən italyan moda evidir. Həmçinin brend L'Oreal Korporasiyası ilə əməkdaşlıq
edərək parfüm istehsal edir. Giorgio məktəbi bitirdikdən sonra Bolonia Tibb
Universitetinə daxil olur, lakin 2 ildən sonra təhsilini yarımçıq qoyub, hərbi
xidmətə gedir. Hərbi xidməti başa vurduqdan sonra Armani, “La Rinascentre”
univermağında işə düzəlir.
1964-cü ildə Armani Cerruti şirkətinə məxsus
"Hitman" kişi geyimləri istehsal edən şirkətə assistent kimi işə düzəlir.
Daha sonra Emanuel Ungaro və Ermenegildo Zegna kimi dizaynerlərlə birlikdə işləyir.
1975-ci ildə dostu Sergio Galeotti ilə birlikdə
Giorgio Armani S.p.A adlı brendini təsis edir. Brendini təsis edərkən kifayət qədər
tanınan dizayner, ilk kişi kostyumları kolleksiyasını qəhvəyi və boz çalarda təqdim
edir. Pencəklərin fərqli kəsimi kolleksiyanı auditoriyaya qeyri-şərtsiz
sevdirir. Daha sonra qadın geyim kolleksiyası təqdim edən dizaynerin bu işi də,
əvvəlkinin uğurunu təkrarlayır. 80-cı illərdə Richard Gere “American Gigolo”
filmində bu brendin kostyumlarında rolunu ifa etməsi brendə dünya şöhrəti gətirir.
Brendin Le Collezioni, Mani,
Junior, Emporio Armani və Armani Jeans kimi yeni seriyaları işıq üzü görür.
1982-ci
ildə L'Oreal Korporasiyası ilə əməkdaşlıq edərək şirkət
parfüm istehsalına başlayır. İstehsal seqmentində Armani dəblə kifayətlənməyib digər
sahələrdə də özünü sınayır. Armani Casa ev üçün məhsullar, Armani Beauty parfüm
və kosmetika, Armani Dolci şirniyyat məmulatları, Armani Fiori gül dekoru,
Armani Ristorante restoranları və Dubayda və Milanda yerləşən Armani otellər şəbəkəsi və s. misal
göstərmək olar. Bütün bu şəbəkələr zəriflik və rahatlıq əsasında Giorgio Armani
şəxsi fəlsəfəsini təcəssüm etdirir. Bu gün brendin dünyada 2000-dən çox butiki
fəaliyyət göstərir.
